ሴትን ልጅ በፍቅር ለማማለል እንዴት ማናገር ይሻላል?

ወጣት ነኝ፡፡ የምታስብልኝና እኔም የማስብላት በፍቅርም አብረን እንድንሆን የምፈልጋት ሴት ፍለጋ ብንከራተትም ላገኝ አልቻልኩም፡፡ ለዚህ ችግር ምናልባት እንቅፋት የሆነኝ ደካማው ሴቶችን ቀርቦ የማናገርና የማማለል ችሎታዬ ይመስለኛል፡፡ እናስ ይህን ቀርቤ የማናገር ችሎታዬን እንዴት ላዳብር እችላለሁ? አለዚያ ብቻዬን መቅረቴ ነው! ታደሰ ቢ

ውድ ታደሰ ችግርህ ችግራችን ብለን እነሆ ተከታዩን ምላሽ አዘጋጅተናል፡፡ ብዙ ጊዜ በራሳቸው ሀሳቦች ሙሉ በሙሉ የተዋጡ ሰዎችን ብቻ ሳይሆን ለሰዎች ትኩረት የሚሰጡ ሰዎችን እንዲያዳምጡን ለማድረግ ይቸግረናል፡፡ ምክንያቱ ምናልባት የእኛ አንጀት ርቱዕ አለመሆን ወይንም ቀልብ የመሳብ ብቃት አንሶን ሊሆን ይችላል፤ የሆነው ሆኖ ቁም ነገሩ ይህ አይደለም፡፡ ቁም ነገሩ እንዲሰሙን ወይንም እንዲያዳምጡን ማድረግ መቻል ነው፡፡ ግን እንዴት?

የጨዋታችን ዋነኛ አላማ የፍቅር ሰለባን በእጅ ውስጥ ማስገባት ነው፤ ሰለባን ለመቆጣጠርም ተደማጭነትን ማግኘት ከምንም ነገር በላይ ተመራጭ ነገር ነው፡፡ የሚደመጡ ወይንም ሌሎች ትኩረት የሚያደርጉባቸው ሰዎች ደግሞ ርቱዕ አንደበትን የተጎናፀፉ፤ ለሌሎች መልካም ስሜት ያላቸው ወይንም ቀና አሳቢዎች ብቻ ናቸው ካልን ተሳስተናል፡፡ ባህሪያቸው ያዝ ለቀቅ የሆነና ከየትኛውም ሰው ጋር የማይገጥም አፈጣጠር ያላቸው ሰዎች እንዲያውም ጉልህ በሆነ ሁኔታ ትኩረታችን ከመሻማታቸው በዘለለ በፍቅር እንድንጦፍላቸው ሊያደርጉን ይችላሉ፤ ለምን ከተባለም ምን ጊዜም የሰው ልጅ አእምሮ ግልፅ ያልሆነለትን ወይም ግራ ያጋባውን ነገር ለመረዳት ወይም ለማወቅ ያለው ጉጉት ከልክ ያለፈ በመሆኑ ነው፡፡ ታዲያ መች ያለ ምክንያት ሆነ ሁለት ፍፁም ተቃራኒ ባህሪን የያዙ ጥንዶች በአንድ ጣራ ስር በፍቅር የአብሮነት ዘመናቸውን የሚያሳልፉት?!
ሰለባህን በጣፋጭ ቃላት ማማለል አንደኛው ዘዴ ሊሆን ይችላል፤ ጣፋጭ ቃላትን ተጠቅሞ መቅረትም ትክክል አይደለም፤ ጣፋጭ ቃላቱን በመራራ ቃላት ለውሶ ግራ ማጋባት እንዲሁም ጠቃሚ ሀሳቦችን ነካክቶ በመተው ፍላጎት እንዲንር ማድረግ እጅግ አደገኛ የማማለያ መንገድ ነው፡፡
ማወቅ ያለብህ ቁልፍ ነገር
ማውራት ከመጀመራችን በፊት ስለምናወራው ነገር አስቀድመን የምናስብ እጅግ ጥቂቶች ነን፡፡ ለዚህም ነው አብዛኞቻችን በጭንቅላታችን ውስጥ ፈጥኖ የመጣውን ወዲያውኑ በምላሳችን የምናስተጋባው፤ በዚህም መሰረት የምንናገራቸው ነገሮች ከራሳችን ፍላጎትና ምቾት አንፃር የመነጩ ይሆናል፡፡ ሁኔታውን ከሰው ልጅ ተፈጥሯዊ የራስ ወዳድነት ባህሪ ነው ልንለውም እንችላለን፤ የሆነው ሆኖ ሁኔታው የፍቅር ወጥመድ የጉዞ ብቃትና ሃይልን የሚያሳንስ መሆኑን ማመን ተገቢ ነው፡፡ ምክንያቱም ሰዎችን በፍቅር ማማለል የሚቻለው በመናገር ብቃት አሊያም በድምፅ ዜማዊ ቅኝትን በመጠቀም ብቻ አይደለም፤ እንዲያውም ቆም ብሎ ማሰብና ወጥመዱን በመዘርጋት ሂደት ጊዜን በመሰዋት መጓዝ ከየትኞቹም የማማለያ ስልቶች ሁሉ የላቀ ነው፡፡ ምን ጊዜም በአእምሮህ የሚመጣውን ሀሳብህን ወዲያው ለመናገር የምትፈጥን ከሆነ ማንነትህን አንድም ሳታስቀር ለሌሎች እየነገርክ ከመሆንህም በተጨማሪ ራስ ወዳድ መሆንህንም አመላካች ነው፡፡ ሁኔታው ግልፅነት ነው ብለህም ራስህን ማታለል የለብህም፤ ምን ጊዜም ከራስህ ለራስህ ብቻ የሚቀር የውስጥ ባህሪ ማስቀረት መቻል የፍቅርን ወጥመድ ውጤታማ የሚያደርግ ነገር ነው፡፡ ግልፅነት መልካም ነገር ቢሆንም የተጋነነ የግልጽነት ባህሪ ግን በዚህ ሁኔታ የማይጠቅም ሲሆን በስተመጨረሻ የራስ የሆነ ነገር እንደሌለህ ሁላ እንዲሰማህ ሊያደርግ ይችላልና መጠንቀቀ ተገቢ ነው፡፡
በንግግር ወቅት ጤነኛ ቋንቋንና የማማለያ ቋንቋ በምትጠቀምበት ሂደት ጥንቃቄ ማበጀት እጅግ የሚመከር ጉዳይ ነው፡፡ ከእናትህ ጋር የምትጠቀምበት የንግግር ለዛ አሊያም ዘይቤ ለታዳኝህ ይሆን ዘንድም ልትጠቀምበት አይገባም፤ እናትህና ታዳኝህ የተለያዩ ሰዎች ከመሆናቸውም በተጨማሪ እነርሱን የምትቀርብበት ዓላማም የተለያየ ነውና፡፡ ብዙዎቻችን ግን ከእናቶቻችን ጋር በምናወራበት መንገድ ወይም ቤተሰባዊ ቋንቋን በውጭው ዓለም (በተለይም በፍቅር) ግንኙነታችንም ልንጠቀምበት ስለምንሞክር ብዙም ሳንራመድ ውድቀት ያጋጥመናል፡፡
ቤተሰባዊ (normal) ቋንቋ የሚባለው ብዙውን ጊዜ አማላይነት የሌለውና ተራ ድምፅ ወይንም ‹‹noise›› የምንለው አይነት ሲሆን ትኩረትን የማይስብና ትኩረት የማይደረግበት ነው፡፡ በዚህ አይነቱ የንግግር ግንኙነታችን ሰዎች የምንለውን ሊሰሙ ይችሉ ይሆናል፡፡ ነገር ግን አያዳምጡንም፡፡ ሳያዳምጡ በፍቅር ማማለል ደግሞ አይቻልም፡፡ ለዚህም ነው ቤተሰባዊ ወይንም ‹‹ኖርማል›› ቋንቋን በዚህ ሂደት መጠቀም አያዋጣም የሚባለው፡፡ ስለሆነም ኖርማል ቋንቋን በርዞ አማላይነትን ማጎናፀፍ ከአጥማጁ የሚጠበቅ ሲሆን ይህን ለማድረግ ልክ እንደ አብዛኞቻችን የሚመጣልንን ከመናገር መቆጠብና ለእያንዳንዷ ጥቃቅን ጉዳይ ትኩረት መስጠትን መለማመድ ነው፤ አንዳንድ ሰዎችን ከሌሎች የተለዩና ተወዳጅ የሚያደርጋቸውም ይህ ባህሪያቸው ነው፡፡ በተፈጥሮ ባህሪያቸው ላይ ሰው ሰራሽ ባህሪያትን በመጨመር ህብረ ባህሪው እንዲብለጨለጭና የአብዛኞቻችን አይን (ቀልብ) እንዲያነጣጥርበት ያደርጉታል ማለት ነው፡፡ ታዳኝን በቀላሉ በወጥመድ ሊያስገቡ ከሚያስችሉት መንገዶች መካከልም አንዱ ይኸው ነው፡፡
እንደምናውቀው ሙዚቃ የማንኛችንም አዕምሮ የመጠምዘዝ ሃይል አለው፣ ሙዚቃ ማለት ደግሞ በሙዚቃ መሳሪያ የተቀነባበረ ጥዑም ዜማ ማለት ብቻ አይደለም፡፡ ቃላትን አጣፋጭ ቅመማት ሲሞጅሩባቸው ሙሉ ሙዚቃ መሆን ይችላሉ፣ ስለሆነም ሙዚቃ አይነቱ ብዙ ሲሆን አንዱ ገፅታቸውም የገለፅነው የቃላት ዜማዊ ቅኝት ነው፡፡ አንዳንድ ሰዎች አንዳንድ ቃላትን እንደፈለጉት በምላሳቸው የሚደፈጥጧቸው ወደው ሳይሆን ከፍጭቱ የሙዚቃ ዜማን ይፈጥሩላቸው ዘንድ ነው፡፡ ሙዚቃም ሌላ አይነት የድርጊት ገፅታ አለው፤ ቃላት የሰዎችን ስሜት በሚያነሳሳ መልኩ መጠቀምም ግለሰቦቹ ወይንም ታዳኞች ለሙዚቃ የሚሰጡትን ትኩረት ያህል ለንግግሩ ይሰጣሉ፡፡ ሙዚቃ ሲያጥርና አንዴ ተሰምቶ ፈጥኖ ሲያልቅ ጣፍጦና ተናፍቆ እንደሚቀረው ሁሉ ሙዚቃዊ ቅኝት የሰጧቸውን ቃላትም ተናፋቂ አድርጎ ዘወር ማለት የወጥመዱ ትክክለኛ አካሄድ ነው፡፡ ምክንያቱም ታዳኞቹ የቃላት ሙዚቃውን እንደገና ለማድመጥ በሚያደርጉት ፍለጋ ወይም ጥረት ፈጥነው በወጥመዱ ውስጥ ይገባሉና ነው፡፡
ሌላው ኢ-ቀጥተኛ የሆነው የማማለያ መንገድ (anti-seduction) ወይንም ቴክኒክ ከልክ ያለፈ ተነታራኪ መሆን ነው፡፡ ንትርክ አሰልቺ በመሆኑ ምክንያት በሌሎች ሰዎች ዘንድ በቶሎ እንድንጠላ ሊያደርግ ይችል ይሆናል፤ ሁኔታው ሲደጋገም ግን ትኩረትን ያሰጣል፤ በተለይም ተነታራኪነቱ ከምክንያታዊነትና ከጨዋታ ጋር የተዋጀ ከሆነ በሌሎች ዘንድ ተናፋቂ የሚሆን ክስተት ነው፡፡
በ19ኛው ክፍለ ዘመን የእንግሊዝ ፓርላማ አባል የነበረው ፖለቲከኛው ቤንጃሚን ዲስራኤሊ በዚህ አይነቱ ተጨቃጫቂ ባህሪ ነበር የሚታወቀው፡፡ ዲስራኤሊ ከፓርላማው አባላት ከአንዱም ጋር የማይጣጣም ሲሆን ባህሪውን ግን ሁሉም የፓርላማው ሰዎች ይወዱለት ነበር አሉ፤ ምክንያቱ ደግሞ ዴስራኤሊ ክርክሩን የሚሰነዝረው መጀመሪያ ሁሉንም ካዳመጠ በኋላና የትኛውን ሀሳብ በየትኛው መንገድ በተለይም ሰዎችን በሚያስቅና በሚያዝናና ሁኔታ መምታት እንዳለበት ካወጣና ካወረደ በኋላ ነው፡፡ ዲስራኤሊ ይህን ካደረገ በኋላ በወሬና በሳቅ እያዋዛ የጓደኞቹን ንግግር ቀስ እያደረገ ማውጋቱን የሚቀጥል ሲሆን ንግግሩንም በትኩረት ያዳምጡታል፡፡ ሰውየው አሰልቺና ጥቃቅን ስህተቶችን የማያልፍ ቢሆንም ችግሮችን ወይንም እርሱ የማይቀበላቸውን ነገሮች የሚነቅፍበት መንገድ ኪነጥበባዊ በመሆኑ ምክንያት ግን ሁሉም እንዲወዱት ያደርግ ነበር፡፡
በአጠቃላይ ወጣ ገባ እያለ ግራ የሚያጋባ፣ እንደጉም ምስል ታይቶ የሚጠፋ፤ እንደገናም የሚከሰት አወዛጋቢ ባህሪ እጅግ አደገኛው የማማለያ ስልት ነው፡፡ በዚህ ሂደት ታዲያ ዘዴውን ትክክለኛ በሆነ መንገድ መግለፅ ተገቢ ነው፤ ልታወራቸው የሚገቡህ ነጥቦች ስለ ጓደኝነት ወይም ተቃራኒ ሃሳብን የምታንፀባርቅባቸው ተመሳሳይ ሃሳቦች ሳይሆን ስለ ፍቅርና ጥላቻ በማፈራረቅ ማውራት ይኖርብሃል፡፡ በእነኚህ ጉዳዮች ላይ የሚኖርህ የጨዋታ ሁኔታ መውጠንጠን ያለበትም ቀጥተኛ በሆነ መልኩ ተጠማጁ ላይ መሆን ይኖርበታል፤ በተለይ ደግሞ ታዳኝህ ስለፍቅር አንድ ሀሳብ ካለው አንተ ሀሳቡን በማጣጣል የክርክሩን ድባብ አጧጡፈው፣ ታዳኝ ሳይሆን የታዳኝ ሀሳብን የሚያጥላላ ንግግር መጨመርም ጥቅም አለው፤ እዚህ ላይ ጥንቃቄ ማድረግ የሚኖርብህ ይሆናል፤ በተለይም የሰዎችን ሀሳብ ለማጣጣል በምትሞክርበት ወቅት ፍፁም ጥላቻን የሚያንፀባርቅ ሀሳብ በአንተ ላይ ፍፁም ጥላቻን ሊያደርስብህ ይችላልና ነው፡፡ ቁም ነገሩ የምትናገረው ነገር ሁሉ ከየትኛው ጎራ እንደሚመደብ ግልፅ ያልሆነ ወይንም እንቆቅልሽ መሆኑ ነው፤ እንቆቅልሹ እንቆቅልሽ ሆኖ በታዳኝ ፊት መቅረብ ይኖርበታል እንጂ የእንቆቅልሹን መልስ አንተው መልሰህ መገኘት አይኖርብህም፡፡ ሁሉም ነገርህ ለታዳኝ የቤት ስራ መሆኑ ጥረቱን፣ ፍላጎቱንና ፍቅሩን የሚያንረው ይሆናል፡፡
ስለሆነም አንተም ከላይ የጠቃቀስካቸውን ሀሳቦች በሀሳብህ አሳድረህ፤ የተመለከቱትንም መፍትሄዎች ከተገበርክ መፍትሄ የምታገኝ ይመስለኛል፡፡ የትኛውንም ሴት ማናገር ብቻ ሳይሆን በፍቅርም መጣል ትችላለህ፡፡ መልካም ዕድል፤ ሰላም!

http://www.tenaadam.com/archives/1336